Hi Dave
Gibe verspötet au no min Senf als ehemalige gixxer Fahrer dezue! Ich han ufre K8 agfange, us ähnliche Gründ. Find immerno das Ding gseht geil uus :).
Zum Punkt, dass sie schwierig zum beherrsche isch: stimmt jein. Eigentli isch sie ide meiste Situatione sehr eifach zum Fahre. Mit de drosslete häsch eh nöd gnueg PS zum würkli wilds Züg mache. Im Alltagsvercher sind die Dinger müehsam zum Rangiere wegem Stummellenker, aber au das gaht wenns di nöd stört. Ade prüefig bim Slalom wirds denn aber zum Challenge, willd durs Usholle riesigi Chreis fahre muesch :).
Zude präzision, es stimmt au nur jein. SSler sind det präzis, wofür sie baut sind - für mittelscharfi Kurvene bi hohe Gschwindigkeite oder us Erfahrig zum über d'Autobahn bloche.
Mini subjektiv Meinig (cha variiere!):
Mir hät sie scho gfalle, vor allem wills min erste Töff/Motorfahrzüg überhaupt gsi isch. Ha sie nachher bereut wills vor allem fürd Schwiiz git. Die Berich wo mit SSler geil zum (legal) fahre sind gits da allefalls höchstens bi Autobahniifahrte. Uf DT/AT Landstrasse machts no eher Sinn. Zum scharfi Passkurvene fahre gits us Erfahrig au bessers. Bi recht gross, drum hani nöd langi Toure chönne mache ohni dass alles weh ta hät :P. Bi mir isch sie leider über es Jahr weg ständig usgstiege.
Zum drossle:
Da isch bide gixxer geil gsi, dass sie über s'Stürgrät drossled gsi isch. Me hät die maximale Drehzahle locker erreicht (au Späss wie im 1. Gang bis über 100 beschlünige), er hät eifach sanfter zoge. Für en 25kw hät me also ordentlich chönne fahre und dadure muessen scho lobe.
Aber: Bi hütige Töff wo elektronisch drossled sind, wie z.B. KTM wird eifach s'Mapping umprogrammiert, wobii mer dete glaubs relativ frei d'kW Azahl cha festlegge. Sicher bi de K8, K9 und einige Vorgänger seig die Drosslig nöd per Software gmacht, sondern mer müessi s'ganze Stürgrät ersetze. Mer hät mir 2012 agä das chosti über 1000 Fr. plus Arbet und Abnahm. So machts denn u.U. doch Sinn, de Töff eme andere Afänger z'verchaufe oder es bruchts Stürgrät sueche. Weg dem und anderne Gründ han ich mini denn vor 3 Jahr verchauft. Ich glaub nöd dass für die Jahrgäng (legal) Stürgrät mit 35kw gä wird, aber a dem happereds imfall nöd! Und au wenn, es wür sich wohl priislich nöd lohne. Mach der weg de Leistig kei Sorge, de K8/K9 chasch mit 25kw wunderbar fahre, sie zieht scho easy :). K6-K9 sind ja 06er-09er, und während dere Ziit sind no viel Töff per Gasaschlag drossled gsi. Wies hüt isch weissi nöd, cha scho sii dass sich bimeme Töff vo damals mit Gasaschlagdrosslig was mache laht bzgl. de 35kw. Die Variante isch vermuetli eineweg günstiger als die Gschicht mit de Stürgrät. Chönnt susch mal bi Honda/Kawasaki nafrage.
Gah wenn möglich go probefahre, dä und no en andere Töff. Eifach zum impressione sammle. Wenn d'gixxer dir aber so guet gfallt und denn immerno devo überzügt bisch, nimm sie unbedingt. En Töff muess eim persönlich gfalle und Emotione wecke, susch chaner no so praktisch sii, aber s'feeling stimmt irgendwie doch nöd. Vernunft bide Töffuswahl, das gits nöd würkli ;).
Lg
Nachtrag 14.07: Habe mal bei einem Hondahändler nachgefragt, ob man die älteren Modelle auf 35kw drosseln kann. Es sei so, dass dies momentan nur bei diesjährigen und letztjährigen Modellen möglich sei. Frühere Jahrgänge seien noch nicht Typengeprüft, würden aber sukzessive folgen. Ich gehe mal davon aus, dass dies bei anderen Marken ähnlich aussehen dürfte.