Ig bi grad am Vergliche was für ne Versicherig ig so für mi neu Töff wot abschliesse. Bi welere Firma sit dir, und was zahlet dr so? Bi welere heit dr schlechti Erfahrige gmacht?
Würd mi freue we dr mi chli chöntet bim entscheide ungerstütze 
Versicherig
- Milhouse
- Erledigt
-
Also ich bin bi der Generali und bin voll und ganz z fride. Extrem schnell und mega gueti Beratig. Choschte sind für min töff glaubs so 150 für Haftpflicht, weiss etzt aber grad net...
-
bin bi winterthur,han bis jetzt kei hilf müesse beaspruche, aber si isch scho i ornig.recht unkompliziert und suber.
-
Ich bin au bi dä Winti und muäs sägä ich findäs super, wen ich än Töff muäs lösä oder äs schild wechslet isch das immer i eim Tag gmacht. Tüür sinds au nöd würklich aber durchdas, dass ich halt scho jenschti Töffkürsli bim Cornu und so gmacht han, isch mini versichärigsprämiä eh immer wieder mol chli abä...
Ah jo öppis han ich no wöllä sägä, went ä neui Versicherig lösisch, lohn dir zersch vo äs paarnä ä Offertä schribä, und säg grad am Telefon oder im Gspröch scho, dass bim Kassästurz mol gseh hegisch das mä do gar nöd bi 100% usw. müäs ahfangä, ich han so au scho relativ tüüf chönä ihstigä...
Also vill Glück. -
Also ech be au be de Winterthur und be mega zfrede. Ech ha chönne be 70% oder so istige. Wo ech de Töff ha müesse ilöse hed das alles de Versecherigsmönsch för mech gmacht. Ond choschte tüends au ned so vel. Aber do chani ned gnau säge we vel, dass es werkli esch.
-
Hmm i gloub i wirde vor Winterthur uf jede Fau mau e Offerte la mache, tönt ja sehr guet
Merci für d Tipps!
-
http://www.comparis.ch kennsch?
-
ja natürlech bir winterthur versicherig !!! aber i bügle ja o da !!
ja da vu wäge comparis.ch, das isch de chli es heisses pflaster..... i ha mal prämie uusgrächnet bi üs, und bi när dortä ga luege, stimmt hinde und vorne nid....... und vorallem geit das o je nach "sponsoring", wie das die comparis-lüt darstelle....
-
aha. do hend mer jo grad weder öpis glehrt. lohnt sech also doch wenn mer die müeh of sech nemmt ond sälber offerte i holt.
-
ja das lohnt sich uf jede fall..... muesch eifach no säge dass bi de anderä versicherigä o bisch gsi, de mache si meistens ds bestä aabebot.....
ah ja und de würdi uf jede fall dr "sistierigsverzicht" driinäh..... d.h. dass du überä winter dini schilder nid tuesch iischicke, sparsch bi üs 25% !!!!!!
-
25% !!! Das esch jo rüdig vel. Mues grad mol mim Versecherigsgringo a lüte. Do schmöck ech e hufe Gäld wo für mis BigBike druf god
-
ja weisch wenn de ds kontrollschild iischicksch de zahlsch o kei prämie meh, für die zyt, aber het gliich meh vorteile !! (ussert du würdisch dis schild scho am september - April hinderlege)
-chasch immer ga fahre wenns guet isch.
-sparsch äbe 25%
-bisch eifach vil flexibler -
Ech gebe mis scheld eh ned ab. Genau drom, well ech emmer wot chönne go fahre. Jo muess de mol telefoniere
-
Hei das het sech jo huere glohnt dasi die Umfrag ha gstartet hehe
Das wirdeni i däm fau ou mache, i gibe nämlech mis Schild ou nie ab im Winter..
Hmm schuicke comparis.ch nid eifach es email a d Versicherige? Ha dert o mau e Afrag gstartet gha aber es hei sech nume öpe 2 Versicherige gmeldet die angere nid.
-
ds problem isch eifach das z.t. brutto und netto prämie nid beachtet wird !!!
d.h. bir winterthur steit meistens d'brutto prämie dinne..... also eigentlech "ds tüür" als dases würklech wär... !!!
aber am beste schnäll bim nächste vers. verbii ga !!!
Milhouse : du chunnsch doch vu bärn oder ?? chum doch mal id laupenstr. 19, de überchämi sogar no provision